विचार सङ्कलन

टिस्टा आक्रोश बनेर बग्दैछिन

टिस्टा आक्रोश बनेर बग्दैछिन

–    बी पी बजगाईं

नाम्ची, १९:२५ ३१ जनवरी २०१३

 

टप्प आँशु खस्छ, मातृत्व पग्लन्छ,

पाँच वर्षे नानीको पेटमा भोक कोक्याउँदा

‘कोइरी’ -मा ढुँगा कुट्ने आमाको मन झस्किन्छ|

…

पीडा आमाको मात्र होइन यहाँ, प्रकृति पनि रोएकै छिन,

प्रवाहको विरुद्धमा मान्छे उभिँदा, भक्कानिएको मन थामेकी छिन|

अँह, टिस्टा रुँदिनन्, चाहे डुबेको कोइरी नदेखेर आमा रुँदै बसुन,

उसको नानीको भोकको रोग छिप्पिएर चाहे बज्रपात खसुन|

…

सुमधुर सुसेलीसंग हिजो बग्ने टिस्टा आज

शान्त छिन, सुसेल्न छोडेकी छिन

ढुंगाहरुमा ठोक्किँदै, उच्छृंखल बरालिने टिस्टा

आज बग्न छोडेकीछिन|

कसले बनाए कोनी ती पापी बाँधहरु? सुसेल्न छोडेकी छिन टिस्टा,

गर्भमा थुप्रै व्यथा लुकाउनु पर्दा, बोल्न छोडेकी छिन टिस्टा|

…

यता आमा पनि बेहाल छिन, नानीको भोक कसरी टार्नुपर्ने?

बग्दो टिस्टा पोखरी बनेपछि, कोइरी कुट्न कहाँ जानुपर्ने?

अब त कोइरी कुट्ने ढुंगाहरु पनि सबै टिस्टाले आफैभित्र लुकाइन

मेरो नानी भोकै छ आमाले कसलाई भन्नु पर्ने?

…

आमाको दुख आफ्नै छ, टिस्टा उत्तिकै छिन पीडित

कसले कसलाई बुझ्न पर्ने हो, दुवैको सहनशीलता असीमित|

कसैले नसुने सरकारले सुन्छ भन्छन,

न्याय नपाए गोर्खा जानु भनेको अहिले होइन है,

अन्याय चुलिएर आकाश ढाक्दा पनि

नाक-कान-आँखा भएको सरकार भेटिएन है,
…

जहाँ बग्थ्यो टिस्टा रंगीत, थियो कन्चनजंघा असीम

गाउँथे जहाँ चरीहरुले हाम्रो प्यारो सिक्किम

कालेबुंगपाखा गाउँदै चरी टिस्टा खोला धाउँथिन

टन्न अघाएको छोरो देखेर कोइरी आमा हाँस्थिन

…

अपुई! हो र टिस्टा बग्न छाडिन?

कहाँ हो र? जीवनका अध्यायहरुमा टिस्टा त बग्दैछिन नि,

दैनिक ज्यालाजिवी मजदुरको आँखामा टिस्टा बग्दैछिन नि,

दुइ थोपा आँशु तिम्रो आँखाको टिस्टा कै पानी त हो नि

कोइरी आमाको तृषित खाँचोहरु टिस्टा कै भेल त हो नि|

…

भविष्य यस्तो भन्छ-

भोकाएर कोइरी आमाको छोरो खस्यो,

टिस्टामा माछाहरु छट्पटाउँदै थिए|

नदी किनाराका घरहरु ढल्दा,

थुप्रै भावीहरु सुकसुकाउँदै थिए|

अस्तिमात्र टिस्टामा गाडी झ्वाम्मै खस्यो

शरीरहरु कहाँ भासिए कोनी

प्रकृतिले रिसले होला जीवनको भाउ कस्यो|

…

हो र? साँच्चै टिस्टा बग्न छोडिन?

अहँ, होइन, टिस्टा बग्दैछिन आक्रोश बनेर|